سفره الي محل سهام العبيدي

اليوم راح اسولفلكم من رحت السهام العبيدي ( مال دودي الفايد ترة المحل بس لحد يفتن) اني عبالي سهام العبيدي شخصية خيالية ( افلام كارتون مال ساعة 6 ) اثاري طلع صدك (اثاري لو بلاي ستيشن؟؟) شخصية معروفة ف أني كلت احسن شي استقل الكيا(بوينغ 747 ام ال 234 سليندر) المتوجهة الى مطار سهام العبيدي الدولي ,,,المهم,,, حصلت الفيزا و دكولي 3 ساعات و استقليت الكيا و ما احجيلكم الكيا عبالك الخط المشترك مال تلفونا الارضي كلها تحجي بنفس الوكت و طلعت كيا مال طرشان و امحششين (سطوولة) لأن محد ديفتهم عال لاخ تعالو شوفو اللي سمعته
- عود الله ايخليك المنطقة نازل
- يا نازك؟ نازك الملائكة (شاعر شافط لازم الجريدة بالمقلوبي ) نازك الله يرحمها ماتت من زماااااان
- أمان؟؟؟ هوة وينه الأمان رااااحححححح
- تفااااحح!!!ايي رحمالله والديك دا اكول اشناسي هسة انزل اشتريلي فد ربع كيلو
- كيلو شنو ابني؟ انتة امخبل؟ راح تمشي كيلو؟مو الكيا اتوصلك اي لعد شكو راكبين احنا؟؟؟
- بالله يا جماعة المنتخب اليوم سعبيش راح يخسر ويه الصين؟ بال 9؟ زين يا قناة راح تنقل ال صفار مالتنا؟
( هذا واحد حواسم شافط لابس كيا و راكب تراكسووت قديفة و شعرة امزينة بالدريل )
- يا صفار؟ يا بياض؟ البيض مو زين للقولون بابه عوفو ( واحد مدري شبي اشو باوع عليه بطريقة كلت هذا راح يزوع عليه)
- عيني اني عندي طابوكة احد يندل البلوتوث مالته؟؟؟( حجية امقفصين عليها مشترية طابوكة اب 11 ورقة)
- طابوكة؟ بلكت تنطينياها بلا زحمة عليج دا اريد ابني مستقبلي ( واحد فطير امغلس عال كروة)
- ولكم الحكووو اكو عبوة خضرة بالكيا ( واحد لابس مناظر عمرة ما شايف المعدنوس)
- اخوية هنة باكتين كرفس و راس خس سويتها عبوة؟؟خلفالله عليك
- ايه دا؟ محمدين باعتلي مس كوول بئة جتو داهية حهفو بالدولكة على دماغو ( مصري امقمّل سوة طاعون بالكيا)
كولو وصلت السهام العبيدي ولكم عيني امشي و اكول و عليكم السلام ,,,, هلو ,,, لك هلا ,,, هاي انتة هنا؟؟؟ ,,,,,اهلا شونك حبي؟؟؟ ,,, هلو عيني يعني نص العراقيين شفتهم اكو 2 عبالي ماتو طلعو موجودين هم هنا زين هذا دكتور اب امريكا اني اموصلة للمطار اشجابه هناا؟ عزززززززززززة هاي المرية اعرفها شلل صارلها 30 سنة اشجابها مو بس دا تمشي دا اتكمز ,,,,,,,, المهم طبكت يم ابو اكسسوارات (علمود الحتيت بس ترة اني حباب والله) و سمعت البنات شنو يشتروون تعالو شوفو

- عمو عمو عفيييييييييييييية رايدة تراجي تشبه هايه مال أليسا اللي تطلع لابستها اب حبك وجع (بنية امسوية ذيل حصان مترين بحيث كل ساع واكعة على ظهرها)
- ولج عليمن وجع؟؟؟ امشي طلعي برة دقيقة يا برة هاية بسطية قصدي وخري منا
- لا لا عمو هاي شبيك اريد تراجي مال اغنية حبك وجع
-ماكو
- زين عمو عمو رايدة قراصة اتخلي شعري ما يوكع كدام عيوني من اتفرج روتانا عندك؟
- لا عيني هاي القراصات كلها مال ميلودي و ميوزك
- اوكي اريد حزام مال بنطرون اخضر بس عفية عمو اريدة ابو السحاب
- بنتي اكو حزام بي سحاب؟؟؟ امشي منا لا اسويج جنطة بازة و ابيعج اب الف و نص
-وجعع!!!!
- وجك عليج امشي طلعي منا قبل ما اسويج حزام مال عمرو ذياب اب اغنية حبيبي يا نور العين بررررة
- اوووي ملازم شكد فطيييير

اني خفت تقلب عركة شي كلت افلت و هناك اشوفلك عركة مال 2 اوييي مااامي (كلش اوي جوجي ) و سمعتهم ديكولون
- امشي على كيفك منا ترة اوسخلك ال تيشرت
- اذا ما تروح من كدام كذلتي ابظرف 5 ساعات اللا اجيبلك اخوية الصغير ايزاعلك يومين
- امشيي غشااش ترة راح اكلك (ما احبك ) لا اتخليني انفعل شويونة
- ترة والله اذا ما اتروح ترة والله ما اعرف شسوي يمكن اني هم اروح

المهم كلت بقت عليه؟؟؟ خلي اني هم احشش شوية ف طبكت يم واحد يبيع بناطير (شكله قفاص هذاك وينه بس يللا شسوي)
-السلام عليكم وج و كفة مضروب قاط صبغ
- هلو
- عندك الي رايدة لولا؟؟
- ليش انتة شرايد؟
- بنطرون يعني انتة اش دا اتبيع؟ لالات؟؟؟؟؟
- اللهم طولج يا روح عندي بناطير
- زين اني رايد تك يمنة من هذا التشارلز الفاتح,,,, اليسرة ما اريدة بيعة بعدين انتة عود
- انتة شنو جاي تنصب عليه؟تك يمنة شنو؟؟؟؟؟؟؟
- شبيك بابة؟؟ اخوية معوق و مكصوصة رجلة اليسرة يعني شسوي بالتك اليسرة؟؟؟ ابيعة بالترفكلايت؟؟؟
- سوي وصلة مال مسح
- بشرفك ادفع 25 الف علمود وصلة مسح شنو مخبل كدامك لومنغولي عتيك شايفني؟
- زين ميخالف بعد تأمر اب شي؟
- اريد حذاء تيفال حتة العلج لا يلزك بي
- امشي اطلع برررة
- لا لا هاي آخر شي اريد بنطرون ما بي جيب
-ليش ما بي جيب؟؟؟
- حتى لا احط بي المحفظة و تنكر بالتاتا ف اشيلها اب ايدي احسن
-.................................................. .............. (ما اعرف اشصار اشو صار كسوف و خسوف بنفس اللحظة )

راح احاول أتذكر اشصار بيه

اكتب اليكم الجزء الاخير من الموضوع من طواريء مستشفة اليرموك \ خوش مستشفة والله\ ( ابو البسطية سواها و بسطني بسطة راح ايطلعوها اب حدث في مثل هذا اليوم) بس والله خوش مستشفة هم اكولها و حاليا كاعد دا اعامل الفراش على قنينة مال اوكسجين طلعت اب 40 الف ف اني اتصرفت و وصيت على قنينة غاز (مو ارخص شوية) و هسة اني زين و الحمدالله

هذا اللي يروح ال سهام العببيدي
و تعيشون و تسلموووووووون